علي سلامة .. شاعر العامية المصرية .. أكبر موسوعة شعرية

علي سلامة

وعلي سلامة لمن لا يعرفه شاعر جامد قوي
قصائده بالعامية

ويارب تعجبكم زي ما أبهرتني أشعاره ببساطتها
وخفة دمها ولعبها على الوتر الحساس

خايف أصحى مالاقيش مصر

ساعات بقلق بالليل

يعني بالليل شوية كده

قبل الفجر

حسب الظروف كده

بعد العصر

خايف يوم أصحي

وأفتح الشباك

مالاقيش مصر

ألاقيها لمت هدومها ومشيت

لمت هدومها

علي نيلها

علي هرمها

وطفشت

وحلفت ميت يمين ماهي قاعدلنا

ماهي زهقت

تعبت

إتخنقت

أصلنا زودناها

أكننا استعمرناها

ورثناها

مصر البنوتة الحلوة

اللي زي القمر

بقت عجوزة وشايبة

وبان عليها الكبر

خايف يوم أصحي

وأفتح الشباك

مالاقيش مصر

أنا المواطن نقط

أنا المواطن نقط نقط نقط

ولا بتهان وأسكت زى زمان

أنا بصرخ وأكتب وأبعت وأتكلم

وأسمع بقى يا معلم

أنا المواطن نقط نقط نقط

رقم قومى نقط نقط نقطمحل الأقامة نقط نقط نقط

بجوار البنزينة

بصراحة حرام تعملوا فينا نقط نقط نقط

وتطلعوا نقط ونقط أهالينا

عملتوا انتخابات وكلها نقط نقط نقط

وشيلتوا وحطيتوا حاجات نقط نقط نقط

بصراحة أنا بقيت قدام مراتىحاسس انى مش نقط خالص

وأقولها نفسى أبقى نقط بجد

تقولى يا اخويا ماتحرقش دمك

محدش بينفع حد

حسك ف الدنيابكرة تبقى نقط نقط نقط ....!!!

أحب العسل

احب العسل

واموت فى الكسل

ووقت الازمه اقول فى العشق

حكمه ومثل

وبس خلاص ..

اهجص الاقى ميت مليون هجاص

افكر......
هس.... ولا صوت ولا ناس

لأنى كده ثقافة وعلم

يدوب فى الفيلم فى الكراس

وراسى زى اكبر راس

مفيش احلام مفيش احساس

استراحة ع الصحاوي

استراحة ع الصحراوي

الجو نار

سايق ومحدش معايا

غيري انا والذكريات

وحبه حاجات

ازازه الميه

ونظره عينيا

اللي شايفها في المرايا

بتبص لي من وقت للتاني بغباء

كأنها عارفة الحكاية

او واخده بالها من الطريق

مر السفر من غير صديق

اول شمال احود ولف

الغنوه سكتت

والشريط عمال يسف

وازاي تخف

يا ألم من غير جراحة

ادي استراحة

دماغي محتاجة الصراحة

وقلبي محتاج الحنان

اركن هنا

اشرب يا عم قهوتك

ويلا عشان

نلحق مكان قبل الغروب

واوعي الردار يسحب

ف لحظة غنوتك

معش فاضل في الطريق

ولا استراحة

وأحنا لسة في إبتدائي

وإحنا لسه في إبتدائي

وسط اوراقى القديمة

اللى لسه منها باقي

شوفت صورتى بين زميلى

و احنا لسه فى إبتدائي

الوشوش كانت بسيطة

طاهرة لكن مش عبيطة

نرسم الأحلام خريطة

فى قلبها نقطة تلاقي

هو صاحبى

لما كان فى الدنيا صاحب

اما دول كانوا جيرانى

كل واحد فينا حقق

جزء من بعض الأمانى

أما دى الشاطرة البليدة

العنيدة أم الضفاير

تبقى حبى الأولانى

أد ايه حزنت عليها

لما راحت فصل تانى

ما احنا كنا تختة واحدة

فى تانية تالت

مره قلت

و هى قالت

لما مدت ايدها شالت

دمعة وقعت غصب عنى

جوه كراسة الحساب

كنا لسه صفحة بيضة فى الكتاب

الوشوش كانت بسيطة

طاهرة لكن مش عبيطة

نرسم الأحلام خريطة

فى قلبها نقطة تلاقى

واحنا لسه فى أبتدائي

ناقص حته

ناقص حته

وكل ما أوزن

ألاقي لسه

ناقصلي حته

أحط حته

تقل حته

وأجيب قميص

تضيع جاكتة

وأعيش لي ساعة

يفوتني ستة

وكل ما أوزن

ألاقي ناقص

أقول بناقص

لو هي حته

أتاري لسة

ولسة تاخد

سنين وحته

وحاجات تسيبني

وحاجات تاخدني

لحاجات تخبط

في كل حته

وأقول هنفرح

ف يوم

هنفرح

ويوم مانفرح

علي الله يفضل

في القلب حته

ميـــــــدان الجــيـــزة

ضيعت شوية سنين كده

بحب من بعيد لبعيد

والحكاية مقضياني

ومبسوط وراضي وسعيد

أفرح بأي حاجة

وأستني هدوم العيد

و بعدين ضيعت شوية سنين

نفسي أبقي أشطر واحد في الكيميا

مع إني مش فاهم ميدان الجيزة

والحياة رغم قسوتها

شايفها لذيذة

وضيعت شوية سنين بقي

نفسي أعدي أختبارات الكورة

في النادي الأهلي

وأشتغل في وكالة ناسا

وأبقي واحد م العلماء المهمين

و بعدين ضيعت شوية سنين

منتهي أملي كرسي فاضي

في أتوبيس تلات خمسات

عين الصيرة أم المصريين

وضيعت شوية سنين

عايز أفهم الفرق

بين النكسة والهزيمة

والأحترام وقلة القيمة

و أبقي نجم سيما

م المشهورين

وبعدين ضيعت شوية سنين

واقف عند نظرية المؤامرة

لا عارف أعيش ف الزمالك

ولا راضي أعيش ف غمرة

ومش عارف ليه

الحشيش ممنوع

مدام مصرحين بالخمرة

وياتري بقي أتجوز

واحدة بيضة ولا سمرة

ولا أسأل فيها

رجال الفتوي والدين

وضيعت شوية سنين

مركز ف السيراميك

والبيبان والشبابيك

وألوان الحيطان

وده بيج وده سن فيل

والموضة الأصفر

قشر الموزة

وضيعت شوية سنين

لا انا بحر ولا نيل

حاجة كده بعيد عنك

ملهاش عوزة

ولما بقيت كام وخمسين

لقيتني لسة

بحب من بعيد لبعيد

وبرضة مش فاهم

ميدان الجيزة

معرفـــــش ليـــــه

معرفش ليه

تنّحت للدنيا كده

فجأة لقيتني مسكون بالملل

لا عندي رغبة في البكا

ولا في الكلام

ولا عارف أنام

ولا حتى بسأل إيه ده إيه

و أخرتها إيه

و إيه العمل

و أخاف أقول لأي حد

أحسن يقوم يقلبها جد

حد صاحبي ينزعج

يمد إيده في قلبه من باب الكرم

عشان يشاركني الألم

أو يستلفلي من لئيم حبّة أمل

حالة كده

معرفش إيه

حالة كده ملهاش معالم

ساعات تزورني في الربيع

في الحر

و في عز الشتا

و تجيب حاجات لا فيها روح ولا ميتة

لكني برجع منّها بعد السكات

فاهم شوية في اللي فات

حاسس قوي بحزن الصحاب

محظوظ أنا

ساعات أشاور ينفتحلي ألف باب

لكنّي بغلط في الحساب

معرفش ليه

أسكـــــت يــــــاض

قولي يا عبد الجواد

مش إحنا الشعب

وده مثبوت في البطاقة

ومكتوب ف شهادة الميلاد

ولا مصر خلفت ولاد غير الولاد

طيب ليه

كل ما اتكلم واستخدم حقي

يقولولي اسكت ياض

سنين ساكنين

في نفس الحتة الضيقة

نفس الهوا

ونفس الدوا

ونفس الأمراض

على فكرة

مفيش جبنة في التلاجة

ولا خيار

ولا أعياد

مفيش غير فيلم قديم

كل شوية بيتعاد

مخدتش ولا أديت

لما وشي باة أصفر لمونة

مخدتش ولا أديت

ولما أترميت ف قلب الطاحونة

مخدتش ولا أديت

ولما شميت ريحة شياط

ووقعت فوق دماغي كل الحاجات

مخدتش ولا أديت ..

ولما قالولي من أيه الدم اللي ف وشك

فين روحك

حاسب قلبك بيغشك

مخدتش ولا أديت

ولما حسيت بألم ف راسي

ولقيتني ناسي ..

اسم ابني الوحيد ..

ولما شوفتك رايحة لحتة بعيد

مخدتش ولا أديت..

لحد ما لقيتني مربوط في جبس

وشاش ..

وشايف كل شيء طشاش ..

وحواليا ناس كتير معرفهاش

بيقولولي مين اللي رماك م القطر

يا صابر ....

اسمه ايه ده ..؟!!

بالصلاة ع النبي

احنا عندنا اسمه ايه ده

أحسن واحد يحلل مباريات

يحط التشكيل

الأساسي والبديل

ويقولك إمتى تلعب براسين حربة

وإمتى تلعب من غير راس

ولو ضميرك مش مرتاح

وعندك إحساس

بلاش تشوط ع التلات خشبات

وعندنا اسمه ايه ده

أحسن مهندس خبير

بيرمش بس للبير

يطلع غاز وبترول

وينزل دهب م الحنفيات

وعندنا اسمه ايه ده

أحسن سمكري ف التلاتين سنة

الأخيرة

تخش من مجرى العيون

على عين الصيرة

هتعرفه من مناخيره

ومن شكل العربيات

وعندنا اسمه ايه ده

مجرم قانون دولي ودستور

وإيده خفيفة أوي

في التعديلات

يشيل من هنا

ويحط هنا

جواهرجي يا ربي

مُلقاط

وعندنا اسمه ايه ده

أحسن واحد يحط الفول عالطعمية

ويعمل سندوتشات

وعندنا اسمه ايه ده

أحسن دكتور

مسالك وعظام وقلب وغرام

من نظرة عينك يعرف

كل الحاجات

ولا روشتة ولا إبرة ولا تحليل

ولا إشاعات

وعندنا اسمه ايه ده

أحسن حانوتي آثار

والله لو جاله برد

أبو الهول يموت

وتنتحر الأهرامات

وعندنا اسمه ايه ده

أحسن كاتب

وأحسن مخرج رقص

وأحسن جزار كوارع وعكاوي

وحلويات

وعندنا اسمه ايه ده

ملوش حل ف الزراعة

فواكه وحبوب وخضروات

يقول للأرض قمح

تقوله حاضر

ونخبز ونعمل بسكويت

وفينو بسمسم وبقصمات

وعندنا اسمه ايه ده

صاحب القهوة

كلنا نتيتم ونتشرد

لو بعد الشر

زي الناس ما بتموت

مات

يا أخي انا مش عارف ..

لما أحنا عندنا

اسمه ايه ده

واسمه ايه ده

أمال اسمها ايه دي

مصر ..

مبتتقدمش ليه

وتعبت ..

وزهقت ..

وداخت ..

ولفت السبع لفات

الغـــــم النبيــــــل

مش أنا امبارح

رحت من بيتنا في السيدة

للشغل في حلون

في سبع دقايق

لا شوفت حد زعلان

ولا حد متضايق

والورد إنسان

والنخل متعايق

والناس جميلة مؤدبة

والجو رايق

والدنيا ماشية لوحدها

ولا حد سايق

ومش انا

امبارح برضه

رجعت من الشغل في حلوان

لبيتنا في السيدة

في خمس دقايق

لا حاسس بغربة

ولا شايف غريب

وقلبي ابيض حليب

عندليب

كروان فرحان

شايل ف قلبي وف جيوبي

الفرح أشكال وألوان

وزعت ع الشوارع

والبيوت والجيران

وطلعت البيت

ضربت الجرس

فتحت مراتي وبالأحضان

والعيال كمان فرحانين

ناجحين وجايبين

الدرجات النهائية

من غير دروس خصوصية

قمنا رقصنا وغنينا

واحتفلنا واتغدينا

فضلة خيرك

سمك واستاكوزا

وجمبري م الكبير

وحلينا ب مهلبية

وشربنا الشاي كمان

وفجأة

لقيتني بردان بردان

بصيت لقيت

الشباك مفتوح

ومفيش بطانية

ومراتي جنبي وزي ما هيه

لسة بتعاني من آلام المفاصل

وده اللي حاصل

والحمد لله

على كل شيء

اللهم أجعله خيــــــر

نفسي أتمطع
أنزل .. اطلع
أحلق أقرع
وأتشجع وأقلع
كل هدومي القديمة
وأرمي الحاجات اللئيمة
وأبقى حر كده
زي الطير
نفسي أضحك من قلبي
من غير ما أخاف
وأقول اللهم أجعله خير
يا أخي نفسي مرة
أغير خط السير
يعني مش زي ما روحت
لازم أرجع
نفسي أفرح بضحكتك
من غير ما أخطفها منك
أو أحسدك
أو أطمع
نفسي أبص م الشباك
براحتي
وأقول ياه
الله
يا بختي
نفسي أحس من تاني
بالجمال
يا سبحان من أبدع
نفسي يبقى لية لازمة
ف وقت الحزن .. والأزمة
تلاقيني ببني
بصلح
بغير
بحلم
يعني أنفع
نفسي ده يحصل
قبل كل شيء جوايا .. ما يعجز
أو يودع
نفسي أحب من تاني .. النهار
والعمار
يعني بأختصار
نفسي أرجع تاني
بني أدم
تفتكر ده ممكن ..؟؟؟؟
وأنا ولا بشوف .. ولا بسمع

الـــــواد ابني

الواد ابنى ابو لسان طويل

قالى

يعنى سافرت يا بابا واتغربت

مشوار طويل

وف الاخر راجع

ف شارع متفرع من شارع

وشقة فى الدور الرابع

ودولار نازل طالع

وشوية حاجات

دكان مستنى الترخيص

ومكنسة على خلاط

وكمبيوتر مش نافع

من الاخر معرفتش تتصرف

مقدرتش تقول

لاء

مش مسافر

منين الكحة دى يا بابا

دى عمر

ولابرد

ولا سجاير

انت عارف يا بابا انا بقالى اد ايه بستناك؟؟

ايه يا بابا

انت هتعيط

ده انا كنت بهزر معاك

كنت بهزر معاك

الفاتــــــورة

بقولها فيه إيه ..؟؟

قالتلي مفيش

يا ستي مالك ..؟؟

قالتلي

إعمل نفسك متعرفنيش

قولتلها إيه اللي حصل ..؟؟

قالتلي اشتغلت ف الضرايب

إدارة التفتيش

قولتلها طب إهدي

متتخضيش

إحنا في بيتنا يا ماما

من حقنا نحب ونحلم ونعيش

قالتلي مش إنت إمبارح

جبت ربع جبنة رومي

ونص أسطمبولي

ورغيفين فينو ..

فين الفاتورة ..؟؟

أرجوك .. متحرجنيش

بايظـــــــة

بايظة بايظة

هي بايظة

والنهاردة معدش حد

بيدي جايزة

يبقي أحسن خللي بالك

انسي همك

ضغط دمك

سيبها ماشية بدعوة امك

مستحيل يقدر يضمك

حضن خايف

وأنت شايف

ده اللي لاهي

واللي ضايع ف الملاهي

واللي ساكت بس ساهي

واللي حاله زي حالك

يعني أيه

يعني بايظة

هي بايظة ... بايظة .. بايظة

مرة حرة وبت جدعة

ومرة يعني

ومرة واقعة

وبمزاجها

يعنى لما بتبقي عايزة

تبقي بايظة

بتبقي بايظة

القميص المقلم

ساعات

أنا وروحي نتخانق

ونعلق لبعض المشانق

وضرب وشد

حاجة بجد

تزعل قوي وتضايق

لحد ما ننزف

ونضعف

ونفهم

ونعرف

ونحس بنعمة الحب

ونشكر الخالق

يارب ...

يا خالق القلب طاهر بريء

ارزقني نور الطريق

واكفيني شر اللف والدوران

والحيرة عند المفارق

نفسي قوي ف ساعة رضا

تعبنا يا قلبي م الجري

كفاية كده

سهل السؤال

لكنه صعب وتقيل

صحيح مفيش حل

لكن كمان

مفيش بديل

عايز أشتري دماغي

وزي ما تميل أميل

أقول للحلاق

خف الجناب

وخلي قدام طويل

وأطلّع البنطلون الجينز

والقميص المقلم

وأشرب بدل الشاي

قرفة بالجنزبيل

وأتمشى ع الكورنيش

يمكن عيوني

تقدر تشوف النيل

كان عندي أصحاب

ف المدرسة

والجيش

صلاح ويوسف

مصطفى ونبيل

لكن لما أتصلت بصلاح

وقالولي عقبال أملتك

ده راح وعايش ومتجوز

ومبسوط في إسرائيل

ساعتها بس حسيت

إن الحمل لسة تقيل

رميت البنطلون الجينز

والقميص المقلم

ورجعت من تاني

أنا وروحي نتخانق

عصير جوافة

البت بنتي
ما شاء الله
أدب وجمال وثقافة
جريئة بنت اللذينا
معرفش أزايمش طالعة خوافة
قالتلي يا بابا
مش إنت يا بابا
بتكتب في الصحافة
يعني ممكن يفسحوك
أو يجلدوك
أو يودوك عند جدو في القرافة
إيه يا بابا
ساكت ليه
أعملك عصير جوافة

ثقافــة

فيه ناس لما تضايق

تملا البانيو وشوية بخور

وشمع ومزيكا واغاني

أو تروح تحكي

وتاخد وتدي

مع طبيب نفساني

أو تطلع شرم الشيخ تاني

ودي ثقافة ..

وفيه ناس لما تتخنق

ترجع تقلب ف اللي فات

وتجيب الصور والذكريات

وتاخد جوافة وبلح أمهات

وتروح تزور الميتين

ف القرافة

ودي ثقافة ..

وناس تلم العيال

وربع لب ونص سوداني

وفيلم قديم لإسماعيل ياسين

أو نجيب الريحاني

أو تعدي ع الحلواني
وكيلو مشكل

وتكتر الكنافة

ودي برضه ثقافة ..

والكل مجروح

ونفسه يبوح

بس مش عارف

بحــب البـــرد

بحب البرد ..
ويا سلام
لو حد هرب م الدوشة ..
وراح جابلي ورد ..
وأموت م الفرحة والدهشة ..
لو كتبت قصيدة ..
وقولتلي حلوة ..
قولها تاني ..
اتنطط زي العيال الصغيرين ..
وأقولك أحلف ..
والله العظيم بتتكلم جد ..
يمكن عشان أيام الفرح قليلة ..
سهل تتعد ..
عارف ..
رغم إن المخازن ..
كل يوم بتتحرق ..
ومفيش حساب ولا جرد ..
ورغم وجود السيرك
والأراجوز ..
والتلات ورقات ..
وجوز وفرد ..
عمري ما أتمنيت أكون أمير ..
أو ولي عهد ..
لكني بحلم بوطن ..
مفيهوش ولا حارة سد ..
وطن بيفرح بحاجة ..
غير وصول الأهلي لليابان ..
وحزنه أنبل
م الدموع البلاستيك ..
وعمليات التجميل ..
والشفط والشد ..
عارف ....
رغم إنها بتقع ..
بتغرق ..
بتتنيل بستين نيلة ..
لكن جميلة ..
وعمرها ما هتتهد ..
عشان كده ..
أنا لسة بحب حاجة ..
ولسة في قلبي حد ..

بص .. حأقولك

بص .. حا أقولك
م الأخر
أنا عندي عربية
مركبتهاش
ومعايا فلوس
مكسبتهاش
وجوزوني بنت حلوة
محبتهاش
وإشتريت بدلة جديدة
ملبستهاش
كسرت الحمام وغيرته
محستش بأي إنتعاش
خدت بعضي علي جنب
وكان يوم حر ... رطوبة
وقولت لروحي
إيه ياعم
إنت طوبة
قالي لأ
يا صحبي دي حسبة ومحسوبة
أنا أصلي زمان
لمست قلبي
غنوة حب جميلة ... جميلة
لكن يا خسارة
محضنتهاش

بص .. يا عم

بُص يَا عَم
قبل الماتش ما يبتدي
من حقك تختار
ملك ولا كتابة
ولو ف نص الليل
حد جرك من قفاك
قول له بقلب جامد
فين إذن النيابة
وطالما كده كده مسروق
يبقى ع الأقل تعرف
مين هما أفراد العصابة
إنت بس
إشحن حرية
كارت من أبو عشرة
أو عشرين
أو خمسين أو مية
تلاقي قلبك بقى زي الحديد
وقادر تفوت من أي بوابة
وتغني للصبح
وتقول ع الربابة
بس خلي بالك
لو رصيدك خلص
أو أنتهت الصلاحية
هاتتغير العيشة
وهاتعرف إن الدنيا كدابة
بنت كدابة
وهاتفتكر كل اللي راح
وتقول الله يرحمك يا أمه
ويرحمك بقى يابا
لا هتلاقي عيش وملح
ولا أصحاب
ولا أهل
ولا قانون
ولا نقابة
ساعتها بس هتعرف تفرق
بين العصافير والديابة
وإن الكلام الحلو
والغنا الجميل
كان مجرد سحابة
وإنك لسة الواد
ابن الناس الغلابة
وإن لسة فيه خوف
ورصاص
وعسكر
ودبابة
على فكرة مش دايماً
الأسد الجدع النبيل
بيبقى هو ملك الغابة
يا حاج
هو أنا ممكن
يبقى عندي خط حرية
على مهلك
وفكر كويس في السؤال
قبل ما تقول الإجابة

بطاقة تموين

رسالة رايحة
ورسالة جاية
والقلب طاير
والدنيا حلوة
والهوا طيّر كل الستاير
قالتلي صورتك جميلة
قولتلها كان عيد ميلادي
والدنيا برد أواخر يناير
والأمورة دي حضرتك
قالتلي دي أول مرة
أسيب شعري كده
من غير ضفاير
إنت باين عليك ابن حلال
قولتلها أوي والله
وخجول جداً
لا قهوة ولا شاي
ولا سجاير
خريج علوم قسم كيميا
وبشتغل في التنسيق الحضاري
وعندي وصلة دش ونت
شركة مع كل العماير
قالتلي أنا زراعة
قسم حشرات
وموظفة في الشهر العقاري
طول النهار أختم توكيلات
معظمها للبيع وللمحامي
مصر كلها في المحاكم
ومفيش ضماير
قلتلها عاملة أيه
مع الزحمة والناس
قالتلي باخد توك توك
وأكمل بميكروباص
وكل ما أرسم قمر
يطلع يدوب شوية دواير
إحنا خمسة أخوات
ولد على أربع بنات
امي عايشة
وأبويا مات
والموت علينا حق
وده كاس وداير
قلتلها يعني يتيمة زيي
أنا أبويا وامي ماتوا
وسابوا الستر
وبطاقة تموين
ونص فدان مانجا
من تلاتين سنة
لسة بشاير
قالتلي مش عارفة ليه
ارتحتلك .. وفتحتلك قلبي
قولتلها وانا كمان
ولسة هقولها أنا
حبيتك
النت فصل يا معلم
ولاقيتني أنا وروحي
وبطاقة التموين
وشوية زراير

جاتك القرف

على حد علمي
احنا واسرائيل حبايب
فيه سلام ومفيش حرب
طب الظباط والعساكر دول
بيعملوا ايه في ميدان طلعت حرب ..!!
ده بنت وولد نازلين يشوفوا بلوزة
تليق على ايشارب ..!!
بيحلموا وبيغنوا
اجمل ما في غناهم انه طالع من القلب
من امتى العشق كان بيموت من الخوف
ومن امتى الحلم كان بيخاف من الضرب
يا كابتن
يا باشا خليك ابن بلد
هوه انت معندكشي اخوات
صبيان ولا بنات ؟؟!!
يعني انتو كل عليتكوا ظباط ..
يعني انتم أصحاب اكاديمية الشرطة ؟؟!!
واصحاب الشوارع..
والميادين و المحلات ..
واصحاب البلد ؟؟!!
طيب ..
طب انا هاخرم من التحرير لدار القضاء العالي
هاكل كشري واخش السيما ..
مالك بقى ومالي ..؟؟!!
معايا بطاقة وخلصت الجيش ..
بتسمي ده اكل عيش ؟؟!
يبقى عرفتك ..
طب عريني .. فتشني ..
قطعلي هدومي وافحصني وخلصني ..!!
لا انت اول ولا اخر واحد
عارف ..؟؟
انا مرة القطر عدى وداسني وما موتش ...!!!!
عشق الحياة مهوش ترف ..!!
عرفت ايه معنى الشرف ..؟؟!!
جتك القرف..!!
جتك القرف..!!

أخي العزيز ..

أخي العزيز ..

شوية صبر ..

هدوء ..

تركيز ..

أنا عارف إن الحالة ..

تضايق أوي وتغيظ ..

بس مش ها نقضيها ..

أنا الواد أبو دم خفيف ..

وإنت الرايق اللذيذ ..

مصر جميلة بجد ..

بس هو تقريبا فيه حد ..

أعمي دخل بيها ف حيطة ..

الرفرف اليمين طار والمرايات ..

والموتور اتحرق وشوية حاجات ..

واتكسر البربريز ..

بس ممكن ..

إنت عارف إن فيه ..

علماء مصريين ..

في بلاد الأمريكان والإنجليز ..

بس لما العصافير تبطل غونا ..

مش ها نسمع غير البقر والمعيز ..